The Chaumberlayne

The chaumberlayne muste be dylygent & clenely in his offyce with his heed kembed & soo to his soverayne that he be not rechles and se that he have a clene sherte breche petycote and doublet, than brusshe his holen within & without and se his shone & slyppers be made clene, & at morne when your soverayne wyll arle warme his sherte by the gyre & se he have a foot shete made in this maner. First set a shayre by the fyre with a quysshen an other under his fete, than sprede a shete over the dhayre & se there be redy a kerchefe and a combe, than warme his peticote his doublet and his stomchere & put on his hosen & his shone or slyppers than stryke up his hosen manerly & tye them up than lase his doublet hole by hole & laye the clothe a bouthe his necke & kembe his heed, than loke ye have a basyn & an ewere with warme water and a towell and wasshe his hondes, than knele upon you knee & aske you soverayne what robe he wyll were & brynge hym such as your soverayne comandeth & put it upon him tha doo his gyrdell about hym & take your leve manerly & go to the chyrche or chapell to your soveraynes closet & laye carpettes & quysshens & lay downe his boke of prayers, than drawe the curtynes and take your leve goodly & go to your soveraynes chambre & cast all the clothes of his bedde & bete the federbedde & the bolster, but loke ye waast no feders than shake the blankettes & fetche shetes be fayre & swete or elles loke ye have clene shetes, than make up his bedde manerly than l ay the heed shete & the pyllowes, than take up the towel & the basyn & laye carpettes about the bedde or wyndowes & cupbordes layde with carpettes and quysshens. Also loke there be a good fyre brennynge bryght, & se the hous of element be swete & clene & the prevy borde covered with a grene cloth & a quysshen, than se there be blanket donne or cotton for your soverayne, a loke ye have basyn & evere with water or a towel for you soverayne, than take of his gowne, a brynge hym a mantell to kepe hym fro colde, than brynge hym to the gyre & take of his shone & his hosen than take a fyne kerchet of reynes & kembe his heed & put on his kerchet & his bonet, than sprede downe his bedde laye the heed shete and the pyllowes, & whan you soverayne is to bedde drawe the curtynes, than se there be morter of ware or perchoures be redy, than dryve out dogge or catte & loke there be basyn and brynall set nere your soverayne, than take your leve manerly that your soverayne may take his rest meryly.

Here endeth of the chaumberlayne.